आगामी स्थानीय तह निर्वाचनलाई लक्षित गर्दै राष्ट्रिय स्वतन्त्र पार्टी (रास्वपा) ले उम्मेदवार छनोट प्रक्रिया अघि बढाएको छ । पार्टीले ‘क्यान्डिडेट क्लब’ मार्फत सम्भावित उम्मेदवारको खोजी, परीक्षण र प्रशिक्षण सुरु गरेको हो ।
रास्वपाका केन्द्रीय सचिवालयका अनुसार गाउँपालिका तहमा मात्रै उम्मेदवार बन्न करिब २० हजार आवेदन परिसकेका छन् । नगरपालिकाको आवेदन प्रक्रिया जारी रहेको र त्यसपछि उपमहानगरपालिका तथा महानगरपालिकाका लागि आवेदन खुला गरिने बताईएको छ ।

पार्टीले उम्मेदवार छनोटका लागि चार आधार तय गरेको छ । जसअनुसार राजनीतिक सामीप्यतालाई २५ प्रतिशत, नेतृत्व प्रशिक्षणलाई २५ प्रतिशत, समावेशितालाई १० प्रतिशत र आन्तरिक निर्वाचन (प्राइमरी) लाई ४) प्रतिशत भाराङ्क दिइएको छ ।

आन्तरिक निर्वाचनमा सम्बन्धित क्षेत्रका पार्टी सदस्यले मतदान गर्ने व्यवस्था रहेको रास्वपाले जनाएको छ । यस प्रक्रियाले उम्मेदवार छनोटमा केन्द्रीय नेतृत्वको हस्तक्षेप घटाउँदै स्थानीय कार्यकर्ताको भूमिकालाई बलियो बनाउने पार्टीको दाबी छ ।

अन्तरक्रियामा सहभागीहरूले उम्मेदवार छनोट प्रक्रिया निष्पक्ष, पारदर्शी र विधिसम्मत हुनुपर्नेमा जोड दिएका थिए । पार्टीले सक्षम र अनुभवी व्यक्तिहरूलाई आकर्षित गर्न ‘ल्याटरल इन्ट्री’ को व्यवस्था पनि अघि सारेको छ ।