नागढुंगा सुरुङमार्ग प्रयोग गर्ने सवारीसाधनबाट आगामी कात्तिक १५ गतेदेखि सडक उपभोग दस्तुर (टोल शुल्क) संकलन गरिने भएको छ ।

नागढुंगा सुरुङमार्ग निर्माण आयोजनाले सार्वजनिक सूचना जारी गर्दै टोल शुल्क संकलन सुरु हुने जानकारी दिएको हो । सडक बोर्ड नेपालको कार्यकारी समितिले असोज १२ गते गरेको निर्णय अनुसार शुल्क उठाउन लागिएको आयोजनाले जनाएको छ ।
आयोजनाले सार्वजनिक गरेको शुल्क विवरणअनुसार काठमाडौं प्रवेश गर्ने कार, भ्यान, पिकअप, ट्याक्टर, माइक्रोबसलगायत हलुका सवारी साधनले ६५ रुपैयाँ तिर्नु पर्नेछ । काठमाडौं प्रवेश नगरी सुरुङमार्गबाट बाहिरिने यस्ता सवारीसाधनका लागि भने ६० रुपैयाँ शुल्क निर्धारण गरिने भएको छ ।

त्यस्तै, मिनी बस तथा मिनी टिपररट्रकले काठमाडौं प्रवेश गर्दा ११५ रुपैयाँ र बाहिरिँदा ८० रुपैयाँ तिर्नुपर्नेछ । बस तथा ट्रक (सिंगल रियर एक्सल) का लागि प्रवेश गर्दा २५० रुपैयाँ र बाहिरिँदा २०० रुपैयाँ शुल्क तिर्नु पर्ने छ ।

कात्तिक १५ गतेदेखि लागू हुने यो व्यवस्थासँगै नागढुंगा सुरुङमार्ग प्रयोग गर्ने सवारीसाधनले तोकिएको दरअनुसार सडक उपभोग दस्तुर तिर्नुपर्नेछ ।