पछिल्लो केहि दिन यता कैलालीको गोदावरी नगरपालिका–६ मा घरपालुवा जनावरमाथि आक्रमण गर्दै आएको चितुवा नियन्त्रणमा लिइएको छ। वन कार्यालयले राखेको पासोमा परेपछि चितुवालाई नियन्त्रणमा लिइएको हो।

सवडिभिजन वन कार्यालय अत्तरियाका प्रमुख चन्दु भण्डारीका अनुसार चितुवालाई हाल डिभिजन वन कार्यालयमा राखिएको छ। उक्त चितुवालाई शुक्लाफाँटा राष्ट्रिय निकुञ्जमा छोड्ने तयारी गरिएको छ।

वडाध्यक्ष जग्गुराम चौधरीका अनुसार दसैँ यता चितुवाले स्थानीयका आधा दर्जनभन्दा बढी बाख्रा, कुकुर र बंगुर मारेको थियो। बस्ती नजिकै वन्यजन्तु देखिन थालेपछि स्थानीय त्रसित बनेका थिए।