रूख कटान आदेश नपाउँदा धनगढीमा एकीकृत फोहोरमैला व्यवस्थापन केन्द्र निर्माणको काम रोकिएको छ। वन मन्त्रालयले रुख कटानको आदेश नदिएको हो।

धनगढीमा दुई वर्षभित्र फोहोरमैला व्यवस्थापन केन्द्र निर्माण गर्ने सर्त राखेर गत वर्षको पुसमा चिनियाँ कम्पनीसंग सम्झौता भएको थियो। वातावरणीय प्रभाव मूल्यांकन प्रतिवेदन बुझाएर वन मन्त्रालयमा रूख कटान गर्न आदेश माग गरिएको छ।

वडा नम्बर ७ को पटेलामा २२ हेक्टर जमिनमा एसियाली विकास बैंकको सहुलियत ऋण सहयोगमा एकीकृत फोहोरमैला व्यवस्थापन केन्द्र निर्माण हुनुपर्ने हो। त्यहाँ दुई हजारजति बिरुवा काट्नुपर्ने क्षेत्रीय सहरी विकास आयोजना कार्यालय धनगढीको अनुमान छ।

कार्यालयका सूचना अधिकारी इन्जिनियर सौरभ कलौनीले ९६ करोड ८२ लाख ३९ हजार ६ सय ४६ रुपैयाँ ६३ पैसामा धनगढीमा दुई वर्षभित्रै एकीकृत फोहोरमैला व्यवस्थापन केन्द्र निर्माणको सम्झौता रहेको जानकारी दिनुभयो।