३० भाद्र २०८३, मंगलवार
बि प्लस खबर
थारु म्युजिक भिडियोले नयाँ इतिहास रचेको छ । ‘सजन मोर’ शिर्षकको थारु गितले युट्युबमा १० करोड भन्दा बढी भ्युज पाएर इतिहास रचेको हो । एके चौधरीले निर्माण गरी करिब तीन वर्ष अगाडि मल्टीफ्रेम स्टुडियोज नामक युट्युब च्यानलबाट सार्वजनिक भएको यो गित आज (बुधवार) समाचार तयार पर्दा सम्म १० करोड १ लाख ३५ हजार पटक हेरिएको छ ।
कुमार चौधरीको शब्द तथा एके चौधरी र अन्नु चौधरीको स्वर रहेको यो गितमा नरेश चौधरी र मधु चौधरीले मोडलिङ गरेका छन् । यो गितको निर्देशन तथा कोरियोग्राफी सुरज देव कुसुम्यले गरेका हुन् । यो गितको सम्पादन सोम चौधरीले गरेका हुन् ।
गितको एरेन्ज गणेश चौधरीले गरेका हुन् भने मिक्सिङ÷मास्टरिङ चन्द्र चौधरीले गरेका हुन् । नेपाली गित संगितको क्षेत्रमा कमै मात्र म्युजिक भिडियोले युट्युबमा १० करोड भ्युज पाएका छन् । गितको भ्युज १० करोड नाघेपछि म्युजिक भिडियोका कलाकार र निर्माण पक्षले खुसीयाली मनाउँदै छ ।
‘सजन मोर’ गितले युट्युबमा १० करोड भ्युज पाएर इतिहास रचेको थारु गित संगितलाई माया गर्ने कृष्ण महतो बताउँछन् । होटल ह्याप्पी होम नारायणगढका सञ्चालक समेत रहेका महतोले यो गितको भ्युजले नयाँ थारु गित उत्पादनमा हौसला समेत थपेको बताए ।
थारु गितको उत्पादन तथा प्रचारप्रसारमा उनले सहयोग समेत गर्दै आएका छन् । ‘थारु म्युजिक उद्योगमा १० करोड भ्युज एउटै गितले पाउनु ऐतिहासिक हो । थारु गित संगितका धरोहरहरुलाई बधाई तथा शुभकामना भन्न चाहान्छु’, उनले भने । महतो थारु गित प्रवर्द्वनका अभियान्ता समेत रहेका छन् ।
सुरज देव कुसुम्यको कोरियोग्राफी तथा निर्देशनमा बनेको ‘परदेशीया सजना’ गितले पनि थारु इतिहासमा करोड क्बल प्रवेश गरेको छ । उक्त गितको दोस्रो संस्करण परदेशीया सजना २ यहि असोज १७ गते एम एण्ड एस इन्टरटेनमेन्ट युट्युब च्यानल मार्फत सार्वजनिक हुँदै छ । यस गितका लेखक श्याम चौधरी हुन् भने गायक खेम चौधरी र समिक्षा चौधरीको स्वर रहेको छ ।
गितमा गणेश चौधरीले एरेन्ज गरेका छन् । यस गितको मोडलिङमा नरेश चौधरी र सविना चौधरीलाई देख्न सकिन्छ । यो गितको प्रोडक्सन म्यानेजरका रुपमा कृष्ण महतोले काम गरेका छन् ।
