३० भाद्र २०८३, मंगलवार
बि प्लस खबर
कञ्चनपुरकी पुनर्वासमे नगरपालिका ५ सिमरी गाँवमे रानाथारु जाती सुचिकृत दिवस धुमधमासे मनाई हएँ । गओ वर्ष माघ २० गते नेपाल सरकारकी मन्त्री परिषदकी बैठकसे रानाथारु अलग जातीमे सुचिकृत निर्णय रकरी औ २३ गते सार्बजनिक भओ अबसरमे २३ गते कार्यक्रम मनाइँ हएँ । प्रथम सुचिकृत दिवसकी उपलक्ष्यमे रानाथारु उत्थान समन्वय मञ्च कैलाली कञ्चनपुरमे रहे सबए रानाथारुके सुचिकरण भओ दिन सबए याद दिबान औ जाके सबए तक पुगानके ताही कार्यक्रम करी रहए ।
माननिय प्रदेश सभा सदस्य तथा कार्यक्रमके मुख्य अतिथि श्यामलाल राना सुचिकृत दिवसकी शुभ कामना देतए अब अपन हक अधिकारके ताही एकजुट हुइके लागन अनुरोध करी रहएँ । जन चेतना औ शिक्षामे जोड देनसे रानाथारु समुदाय परिबर्तन करन सम्भव हए बिनकी कहाइ रहए ।
कार्यक्रम विशिष्ट अतिथि औ पुनर्वास नगरपालिका प्रमुख जीवन थापा रानाथारुकी सुचिकृतकी खबर अपनेके खुशि महसुस भओ बताइ रहएँ । एक वर्ष पहिले नेपाल सरकार रानाथारु सुचिकृत करके रानाथारु समुदायके पहिचान सुरक्षित करी औ रानाथारु समाज उपर उठनबाले सब भ्रमकी अन्त भओ बताई रहएँ ।
कार्यक्रमके दुसरे विशिष्टदअतिथि,लालझाडी गाउँपालिका अध्यक्ष मदनसेन बडायक नेपाल सरकारकी रानाथारु सुचिकृतसे हमे रानाथारु हानमे गर्वकी अनुभुति कराइ बताइ रहएँ । पुस्ता बित गए सुचिकृतके ताहीँ लडाइ करत करत तओ जाएके जा उपलब्धी हासिल भओ जाके सब मिलके मनान सबकी दायित्य हए बिनकी कहाइ रहए ।
बहे कार्यक्रम मार्फत सुचिकृतको दिन याद करनके ताहीँ रानाथारु अक्षयकोषकी स्थापना फिर करो गओहए रानाथारु उत्थान समन्वय मञ्चके अध्यक्ष धोखे राना जानकारी दैहएँ।
समाजिक अभियान्ता औ साहित्यकार पदम रानाकी फगुनी उपन्याससे संकलन भैरकम मैसे फगुनी छात्रा छात्रवृति राघिका औ रीता रानाके वितरण करोगओ हए फगुनीके लेखक राना बताइ हएँ। जहे कार्यक्रमकी बीच निबन्ध प्रतियोगिताके आयोजना करके विजेतनके नगद पुरस्कार वितरण फिर भओ रहए ।
कार्यक्रममे पुनर्वास १० के अध्यक्ष सुकदेव राना, नेपाल रानाथारु समाजके उपाध्यक्ष ओम प्रकाश राना रानाथारु भलमन्सा औ रानाथारु अगुवा,बुद्धिजिबि मनतब्य धरीरहएँ । कार्यक्रम संचालक तिर्थराज राना रहए ।
