बेलाकी रानाथारु होमस्टे मेला तगारी पुरा हुइगैहए । रानाथारुनकी लोप ओत जाए रहे परम्परा औ संस्कृति संरक्षण करन उद्देश्यसे धनगढी उपमहानगरपािलका वडा नं. ११ बेला गाउँमे ३ दिन लागनबालो मेला जा साल फागुन १५ गते एक दिनको लगैया हए ।

राना कला एवं संस्कृति संरक्षण समाजकी आयोजना होनबालो होमस्टे मेलाकी सबए तयारी पुरा हुइगैहए । मेलामे जा साल फिर तमान गाउँकी होरी ,नाच, झिँझि ,हन्ना लगायत रानाथारु संस्कृति प्रदर्शन हुबैया हए मुल आयोजक समिति अध्यक्ष महाविर राना बताइ हएँ । रानाथारु कलाकारकी प्रस्तुति हए पर कोभिट १९ की कारण मेला एक दिनकी करेहएँ । मेलामे गजब भिड होबैगी,भिड कम करन,घरघर औ देश विदेशमे सबए तक पुगान ताँही बि प्लस मिडिया मार्फत प्रत्येक्ष प्रशारणकी फिर ब्यवस्था हए कहिके अध्यक्ष राना जानकारी दैहएँ ।

खास करके कैलाली औ कञ्चनपुरमे बैठनबाले रानाथारुकी अलग भाषा संस्कृति,संस्कार उजागर करन ताही रानाथारुकी सबसे बडो पर्व होरीकी उपलक्ष्यमे होमस्टे मेला फागुन १५,१६ औ १७ गते करके ३ दिन लागत आओ रहए । मेलाकी ज चौथी साल हए ।