झण्डै चार महिनाअघि १७ वैशाखमा घरनजिकै सडक छेउमा लालझाडी गाउँपालिका–४, जाई सिगलपट्टी शिविरका रामरेशर राना मृत अवस्थामा भेटिएका थिए ।

प्रहरी अनुसन्धानपछि रानाको हत्या भएको पुष्टि भएको छ । हत्यामा संलग्न रहेका तीन जना समेत पक्राउ परिसकेका छन ।

पक्राउ पर्ने श्रीमती माया चौधरी, उनका प्रेमी पुन्ना  राना (बेलौरी नगरपालिका–४) र मानमती चौधरी (लालझाडी गाउँपालिका–४) हुन ।

कञ्चनपुर प्रहरीका नायब उपरीक्षक (डीएसपी) सागर बोहराले तीनै जनालाई पक्राउ गरी अनुसन्धान अघि बढाइएको जनाकारी दिए ।

प्रहरीको अनुसन्धानले हत्या हुनुको मुख्य कारण माया र पुना बीचको अनैतिक सम्बन्ध रहेको देखाएको छ। प्रहरीका अनुसार १६ वैशाखमा रामरेशरले पुनालाई आफ्नै घरमा मायासँग देखेपछि झगडा भएको थियो ।

त्यसक्रममा बाँसको चिर्पटले रामरेशरमाथि प्रहार भयो । त्यही प्रहारले उनको ज्यान गएको हो। त्यसपछि रामरेशरको शवलाई घरबाट सडक छेउमा लैजाने काममा माया र मानमतीले सहयोग गरेको पनि अनुसन्धानबाट खुलेको छ।

जिल्ला अदालत कञ्चनपुरले २६ असारमा पुन्ना रानालाई पुर्पक्षका लागि थुनामा पठाउने आदेश दिएको छ। माया र मानमतीलाई जनही एक–एक लाख रुपैयाँ धरौटीमा छाड्ने आदेश भए पनि धरौटी नबुझाएपछि दुवैजना कारागार चलान भएका छन्।