धनगढी उपमहानगरपालिकाले ‘उज्यालो धनगढी’ अभियानलाई निरन्तरता दिँदै वडा नम्बर ६ स्थित मट्यारी चोकमा हाइमास लाइट जडान गरी सञ्चालनमा ल्याएको छ।

‘एक वडा, एक व्यावसायिक केन्द्र’ कार्यक्रमलाई समेत लक्षित गरी जडान गरिएको उक्त लाइट उपमहानगरपालिकाको ३८औँ हाइमास लाइट हो । लाइटको उद्घाटन वडा सदस्य महेन्द्रबहादुर थापा मगरले गरेका हुन्।

उपमहानगरपालिकाले नगरका विभिन्न चोक तथा व्यावसायिक क्षेत्रमा उज्यालोको पहुँच विस्तार गर्ने उद्देश्यले हाइमास लाइट जडान गर्दै आएको छ । मट्यारी चोकमा लाइट सञ्चालनमा आएसँगै रातिको समयमा आवागमन सहज हुनुका साथै स्थानीयको सुरक्षा, सार्वजनिक गतिविधि र व्यापारिक चहलपहलमा समेत सकारात्मक प्रभाव पर्ने अपेक्षा गरिएको छ ।