सुदूरपश्चिम प्रदेशमा दसैं, तिहार तथा छठ पर्वलाई लक्षित गर्दै ४ हजार ५ सय ५ प्रहरी परिचालन गरिने भएको छ । चाडपर्वका बेला हुन सक्ने चोरी, लुटपाट, ठगी, झैझगडा तथा अवैध गतिविधि नियन्त्रण गर्न प्रदेशभर सुरक्षा व्यवस्था कडा पारिएको प्रहरीले जनाएको छ।

प्रदेशभर १ हजार १५१ स्थानमा प्रहरी ड्युटी व्यवस्थापन गरिनेछ । मुख्य बजार, सार्वजनिक स्थल, यातायात केन्द्र तथा सीमा नाकामा निगरानी बढाइनेछ। यात्रुको सुरक्षाका लागि सहायता कक्ष स्थापना गर्नुका साथै नेपाल प्रहरी र ट्राफिक प्रहरीले संयुक्त रूपमा सवारी जाँचसमेत गर्नेछन् ।
प्रदेश प्रहरी कार्यालय धनगढीका प्रहरी उपरीक्षक महेन्द्र नेपालका अनुसार सम्भावित जोखिमको विश्लेषण गरी सुरक्षा योजना लागू गरिएको छ । विशेषगरी तराईका सीमा नाकामा कुकुरसहितको जाँच सुरु गरिएको छ।