नेपालीहरूको महान् पर्व बडादसैँ आजदेखि सुरु भएको छ । दसैँको पहिलो दिन आज घरघरमा वैदिक विधिअनुसार दियो, कलश र गणेश स्थापना गरी घटस्थापना गरिँदैछ ।
यस अवसरमा पूजा कोठा वा दसैँ घरमा शुद्ध माटो तथा बालुवा राखेर जौ छरी जमरा राख्ने परम्परा छ। जौको पहेँलो जमरालाई समृद्धिको प्रतीकका रूपमा विजयादशमीका दिन टीकासँगै ग्रहण गरिन्छ ।
नेपाल पञ्चाङ्ग निर्णायक समितिले आज बिहान ११ बजेर ४७ मिनेटलाई घटस्थापनाको उत्तम साइत तोकेको छ। घटस्थापनादेखि विजयादशमीसम्मको अवधिलाई नवरात्र भनिन्छ । यस अवधिमा दुर्गा देवीका नौ स्वरूपको पूजा–आराधना गरिन्छ ।
असत्यमाथि सत्य र आसुरी शक्तिमाथि दैवी शक्तिको विजयको प्रतीकका रूपमा मनाइने बडादसैँमा फूलपाती, महाअष्टमी, महानवमी र विजयादशमी विशेष महत्त्वका दिन हुन् ।