धनगढी । नेपाली कांग्रेसको १५औँ महाधिवेशनअन्तर्गत केन्द्रीय सदस्य पदमा डा. जीवन राना थारु महिला क्लस्टरतर्फ सर्वाधिक मतसहित विजयी भएकी छन्। सोही क्लस्टरतर्फ डा. प्रमिला कुमारी गच्छदार पनि केन्द्रीय सदस्यमा निर्वाचित भएकी छन्।

डा. राना कैलाली निर्वाचन क्षेत्र नम्बर ५ बाट केन्द्रीय महाधिवेशन प्रतिनिधिमा निर्वाचित भएकी थिइन्। पार्टीको १४ औँ महाधिवेशनमा पनि केन्द्रीय सदस्य बनेकी डा. रानाले पुनः केन्द्रीय नेतृत्वमा आफ्नो स्थान सुरक्षित गरेकी हुन्।

यसअघि डा. राना सुदूरपश्चिम प्रदेश नीति तथा योजना आयोगको उपाध्यक्षमा समेत नियुक्त भएकी थिइन्। पार्टी संगठन र प्रदेशको नीतिगत तहमा काम गरिसकेकी उनको पुनः केन्द्रीय सदस्यमा भएको विजयलाई राजनीतिक अनुभव र नेतृत्वको निरन्तरताका रूपमा हेरिएको छ।

थारु महिला क्लस्टरतर्फ सर्वाधिक मतसहित विजयी भएसँगै डा. रानाको केन्द्रीय नेतृत्वमा प्रतिनिधित्व थप सशक्त बनेको छ। थारु महिला कलस्टर तर्फ मतगणना सम्पन्न भए पनि निर्वाचनको आधिकारिक मतपरिणाम सार्वजनिक हुन बाँकी रहेको छ ।