थारू सांगीतिक इतिहासमा पहिलोपटक ‘आरके थारू एन्ड संघाति ब्यान्ड’को आयोजनामा भव्य रूपमा थारू लाइभ कन्सर्ट हुने भएको छ।

दसैँ सांस्कृतिक फेस्टिभलको अवसरमा असोज ३१ गते धनगढीस्थित ओम प्यालेसमा उक्त कार्यक्रम आयोजना हुन लागेको हो।दिउँसो ४ बजेदेखि सुरु हुने कन्सर्टमा थारू गीत–संगीत तथा सांस्कृतिक प्रस्तुतिमार्फत दर्शकलाई मनोरञ्जन प्रदान गरिनेछ।

थारू कला, संस्कृति र संगीतको प्रवर्द्धन गर्ने उद्देश्यका साथ आयोजना हुन लागेको यस कार्यक्रमलाई सांगीतिक क्षेत्रका लागि विशेष अवसरका रूपमा हेरिएको छ।कार्यक्रमको अर्को महत्वपूर्ण पक्ष बाढीपीडितलाई सहयोग गर्नु हो। कन्सर्टबाट संकलित सहयोग रकम रसुवा बाढीबाट प्रभावित पीडितहरूको सहयोगका लागि उपयोग गरिने जनाइएको छ।

मनोरञ्जनसँगै मानवीय सेवाको भावना जोडिएको यस कार्यक्रमले थारू समुदायको सांस्कृतिक पहिचानलाई थप उजागर गर्नुका साथै विपद्मा परेकाहरूलाई सहयोग पुर्‍याउने अपेक्षा गरिएको छ।

थारू संगीतप्रेमी, कलाकार तथा दर्शकहरूको सहभागिताले कार्यक्रमलाई भव्य र सफल बनाउने आयोजकको अपेक्षा छ।