वेस्ट इन्डिजका अलराउन्डर फेबियन एलेन नेपाल प्रिमियर लिग (एनपीएल) को तेस्रो संस्करणका लागि सुदूरपश्चिम रोयल्समा अनुबन्ध भएका छन् ।

३१ वर्षीय बायाँहाते ब्याटर तथा स्पिनर एलेन टी–२० क्रिकेटका अनुभवी खेलाडी हुन् । उनले वेस्ट इन्डिजका लागि २० एकदिवसीय र ४२ टी–२० अन्तर्राष्ट्रिय खेल खेलेका छन्। सबैखाले टी–२० क्रिकेटमा १७८ खेल खेलेका उनले १ हजार ६३४ रन बनाउनुका साथै १०९ विकेट लिएका छन् ।

विश्वका विभिन्न फ्रेन्चाइज लिगमा खेलिसकेका एलेनको आगमनले टोलीको स्पिन बलिङ र तल्लो क्रमको आक्रामक ब्याटिङ बलियो हुने सुदूरपश्चिम रोयल्सका प्रमुख कार्यकारी अधिकृत प्रकाश खड्काले विश्वास व्यक्त गरेका छन् ।

टोलीमा अनुबन्ध भएपछि एलेनले नेपाल आएर एनपीएल खेल्न र सुदूरपश्चिम रोयल्सको सफलतामा योगदान दिन आफू उत्साहित रहेको बताएका छन् ।