कैलालीको गोदावरी नगरपालिका–१, अत्तरिया वनदेवी टोलमा एक घरमा चोरी भएको छ । दसैँ मनाउन घरपरिवार पहाड गएको मौका छोपेर हरिमोहन भट्टको घरबाट ६ तोला सुन, २ तोला चाँदी र गुल्लकमा जम्मा गरेको करिब डेढ लाख रुपैयाँ चोरी भएको हो ।

घर धनी भट्टका अनुसार उनी असोज २५ गते दसैँ मनाउन बैतडीस्थित पहाडी घर गएका थिए। कार्तिक ५ गते घर फर्किएपछि चोरी भएको थाहा पाएका थिए।

छिमेकीका अनुसार असोज ३१ गते राति घर आसपास शङ्कास्पद गतिविधि देखिएकाले सोही रात चोरी भएको हुन सक्ने भट्टको आशङ्का छ। उनले घटनाबारे इलाका प्रहरी कार्यालय मालाखेतीमा उजुरी दिए पनि चोरी भएका सामान तथा रकम अझै फेला नपरेको बताएका छन् ।