नेपाल प्रिमियर लिग (एनपीएल) को सुरक्षाका लागि दैनिक एक हजारभन्दा बढी प्रहरी परिचालन हुने भएका छन् । जिल्ला प्रहरी परिसर काठमाडौंले प्रतियोगितालाई लक्षित गर्दै विशेष सुरक्षा योजना बनाएर काम सुरु गरेको हो ।

काठमाडौं प्रहरी प्रमुख एसएसपी दिलीप घिमिरेका अनुसार खेलाडीको सुरक्षा, उनीहरू बस्ने आठ होटल, होटलदेखि कीर्तिपुरस्थित त्रिवि क्रिकेट मैदानसम्मको आवतजावत, ट्राफिक व्यवस्थापन तथा दर्शकको सुरक्षालाई प्राथमिकतामा राखिएको छ ।

खेलको उद्घाटन र समापनमा आउने भीआईपी तथा भीभीआईपीको सुरक्षाका लागि पनि विशेष व्यवस्था गरिनेछ। सुरक्षाका लागि सादा पोशाकका प्रहरीसमेत परिचालन हुनेछन् ।

प्रहरीले सीसीटीभी, ड्रोन र तालिमप्राप्त कुकुरमार्फत निगरानी गर्ने जनाएको छ। नेपाल प्रहरीसँगै बाह्य सुरक्षामा सशस्त्र प्रहरी बलसमेत परिचालन गरिनेछ ।