कञ्चनपुरको बेलौरी नगरपालिकामा ईन्जिनियर भर्नामा त्रुटी भएको छ । ईन्जिनियर भर्नामा बेलौरी नगरपालिकाका कर्मचारीको हातबाट त्रुटी भएको बताइएको छ भने त्रुटीलाई स्थानियले नियोजित चलखेलका रुपमा आशंका गरेका छन्।

नगरपालिकाले चालु आर्थिक बर्ष २०७७÷०७८ मा ईन्जिनियर सेवा सिभिल समुह विल्डिङ्ग तथा आर्किटेक्ट उप समुह अधिकृत स्तर छैठौँ ईन्जिनियर करार सेवाका लागि भर्ना खोलेको थियो । तर त्रुटी हो वा नियोजित चलखेल भन्ने अन्यौलमा परेपछि परीक्षार्थी शनिबार एकाएक परीक्षाहलबाट बाहिरीएका थिए ।

बेलौरी नगरपालिका प्रमुख प्रशाकिय अधिकृत एवम् पदपूर्ति समितिका संयोजक नेत्र प्रशाद पौडेलेले कर्मचारी भर्ना  कुनै चलखेल नभएको बताएका छन् । तर यहाँ  नियाेजित ढंगले बुनिएको योजना तुहिएकाे परीक्षार्थीको भनाइ छ ।

के भएको थियो ईन्जिनियर पदकाे परीक्षामा :

परीक्षामा जबकि स्थानीय तह सेवाको प्रश्नपत्र हुनुपर्नेमा संघको छुट्टै प्रश्नपत्र राखेपछि परीक्षार्थी अन्योलमा परे । लगत्तै परीक्षाहलमा परीक्षार्थीबाटै चर्को विरोध भयो । चलखेल र षड्यन्त्रको आशंका गर्ने ठाउँ भएको भन्दै परीक्षा छाेडेर तिनजना परीक्षार्थी बाहिरिएका थिए ।

त्यसपछि बेलाैरी नगरपालिका परीक्षा समितिका सदस्य सुशीला लेखकले कर्मचारीबाट त्रुटी भएको स्विकार्दै तत्काल परीक्षा स्थगित गरिएकाे घाेषणा गरिन् । विषय विज्ञ समेत बाेलाएकाे अवस्थामा कर्मचारी भर्ना समितिले यहाँ सम्मकाे त्रुटी गर्नु सामान्य कुरा थिएन् । यद्यपि शनिबार लिएको लिखित परीक्षामा समितिले विचमै स्थानीय तह सेवा करारको भन्दा फरक प्रश्नपत्र हातमा थमाएपछि चर्काचर्की भयो ।

“तर याे कसरी भएको त्रुटी हाे भन्ने कुरामा हामी जनप्रतिनिधि जिल्ल परेकाे छाैं ! नगर उपप्रमुख चित्रकुमारी चाैधरीले भनिन् – हामीलाई कर्मचारीले केही भनेका छैनन् ।”

चाैतर्फि बिरोधपछि नगरपालिकाले परीक्षा नै रद्द गरेको छ । स्वयंम कार्यालयले नै ईन्जिनियर पदको परीक्षा कार्यक्रम संशोधन भन्दै १३ बैशाखमा हुने एक सुचना कार्यालयकाे भित्तामा टाँसिएकाे छ ।