४ आश्विन २०८३, आईतवार
बि प्लस खबर
रानाथारु भासाको ब्याकरण सम्बन्धि ४ दिनको भर्चुअल कार्यक्रम सपडो हए । नेपाल रानाथारु समाजके उपाध्यक्ष/ब्याकरण निर्माण समितिके संयोजक कमल सिं रानक अध्यक्षतामे सपडो कार्यक्रममे विशिष्ट अतिथी नेरासके अध्यक्ष माननीय कृपा रामा राना, भाषाशास्त्री डा. दुबिनन्द ढकाल रहएँ ।
ब्याकरण निर्माण समितीके तरफसे शिक्षक राजकुमार राना कार्यक्रम सहजीकरण करि रहएँ ऐसिए प्रस्तोताके रुपमे शिक्षक प्रेम चन्द राना, लक्षवीर राना, बासमती राना औ पूनम राना कार्यक्रममे निर्माणाधीन ब्याकरणके बारेमे छलफल औ अन्तरकृया चलाइ रहएँ । ४ दिनको जा अन्तरकृयात्मक भर्चुअल कार्यक्रम को उद्घाटन कार्यक्रमके खास पहुना (प्रमुख अतिथि) माननिय नारदमुनी राना करि रहएँ ।
लगातार ४ दिनले चलो जा कार्यक्रममे रानाथारु समुदायसे संघसंस्थाके पदाधिकारी, समाजिक अगुवा, संस्कृति प्रेमी, लेखक, शिक्षक, विद्यार्थी, युवाको सहभागिता रहए । तमान सहभागी अपन अपन बिचार धरन पेति २०७२ मे बनो निर्देशिका/मानक पुनरावलोकन, संसोधनको अवाज उठाइ हएँ ।
काहेकी आज तक जहे मानकके अधारमे रानाथारु भाषक पाट्यक्रमको निर्माण, शब्दकोश, ब्याकरण निर्माण हुइरहे हएँ । भासा/ जाती सूचीकरण पिच्छु रानाथारु पहिचान संगए नेपालमे सरकारी कामकाजको भासा बनान ताहिँ ब्याकरण, शब्दकोश बहुत जरुरी हए औ जा काममे सबएको सल्लाह सुझाव के मनन कर्के सकभर कम त्रुटि होमएँ, भासामे सुदृढीकरण, एकरुपता औ सरलता लान उद्देश्यसे अभेको महामारी बीच भर्चुअल कार्यक्रम करोगओ हए कहिके ब्याकरण निर्माणके संयोजक कमल सिं राना बताइ हएँ ।
कैलाली कंचनपुरमे २७ स्कुलमे रानाथारु भासामे कक्षा १,२,३ तक पढाई हुइरही हए जौनको पाठ्यक्रम बो निर्देशिका/मानक टेकके बनो हए (बि.सं. २०७२ मे बनो ) बो निर्देशिका/मानक जा कार्यक्रमसे पहिले सार्वजनिक ना करोगओ रहए जा बात स्वयम् संस्थाके अध्यक्ष अनबिज्ञ रहएँ बे अपन मन्तव्यमे स्वीकार करि हएँ । समुदायसे बिना अनुमोदित निर्देशिका टेकके बनन जाएरहो ब्याकरण सकभर कम त्रुटिपुर्ण होबए औ समुदायमे सर्बमान्य होबए कहिके सबय बक्ता जोड दै हएँ । आज निभटो जा कार्यक्रममे प्राबिधिक सहयोग रानाथारु डटकम करि रहए ।
