२८ कार्तिक २०८३, शनिबार
बि प्लस खबर
गौरीगंगा नगरपालिका–१०, नुकलीपुरका किसानहरुले बिहीबार हरेरी पुजा मनाएका छन् ।नुकलीपुर गाउँका देशन्ध्या गुरुवा कालुराम डंगौरा र केसौका गोपालदास चौधरीले विधिवत हरेरी पुजा गरेका थिए । थारु समुदायले खेतबारीमा कीरा नलागोस् र धान उत्पादन राम्रो होस् भन्ने उद्देश्यल हरेरी पूजा पुज्ने गरिन्छ ।
धान रोपाइँको काम सकिएर खेतबारी हरियाली भएका बेला धानमा विषालु कीरा नलागोस् र धान उत्पादन राम्रो होस् भनेर थारु समुदायले हरेर वर्ष हरेरी पूजा पुज्ने गाउँका भलमन्सा हिंगुराम चौधरीले बताए । गाउँको देशबन्ध्या गुरुवा (ठूला गुरुवा) को सहयोगमा गरिने सो पूजापछि खेतबारीमा कीरा नलाग्ने र धान राम्रो उत्पादन हुने थारु समुदायमा बिश्वास रहदै आएको छ ।
उहिले भगवान शिव पार्वतीले पनि खेती किसानीको काम गर्ने गरेको र खेतको हरियाली धान देखेर मोहित भएका शिव भगवान घर आउन पत्तो पाउँदैनथे । त्यस्तो भएपछि पार्वती घरमा कुर्दा कुर्दै हैरान हुन्थिन् । शिव छिटै खेतबाट घर आउन् भनेर पार्वतीले खेतमा कीरा लगाएर शिवलाई निराश बनाएकी थिइन् ।
खेतमा लाग्ने पानीको मुहानमा शुद्ध गाईको दूधको धार चढाउनाले खेतका कीराहरू नष्ट हुने र खेती पुनः हरियाली हुने उपाय पार्वतीले सुझाएपछि शिवले त्यसै गरे । खेत नराम्रो भएपछि शिव भगवान छिटै खेतबाट घर आउने गर्थे । तर, शिवको निराशा देखेर पार्वतीले छिटै खेतबाट घर आउने वाचा गराएर खेतलाई पुनः हरियाली बनाइदिने बताएकी थिइन् ।
त्यसपछि फेरि खेतमा हरियाली कायम भएको किम्वदन्ती छ । यही किम्वदन्ती अनुसार थारू गाउँमा गुरुवाको सहयोगमा शिव पार्वतीलाई सम्झेर पूजापाठ गर्ने र खेतबारीमा कीरा फट्याङ्ग्रा नलागून् भन्ने कामना गर्दै हरेरी पुजा पुज्ने गरिन्छ ।
संस्कृतिका धनी आदिवासी थारूको सामूहिक रुपमा गरिने चार पूजा (धुरिया पूजा, हरेरी पूजा, लवाङ्गी पूजा, निकासी पूजा) मध्ये हरेरी पूजा एक महत्वपूर्ण पूजा मानिन्छ ।
