२८ कार्तिक २०८३, शनिबार
बि प्लस खबर
गोदाबरी नगरपालिका –५ (गेटि) गाउँमे घर भए, हाल (अभे) संयुक्त राज्य अमेरिकामे कार्यरत संगीतकर्मी कृष्ण रानाक शब्द संगितमे रानाथारु गीत आन तयारीमे हए । निर्माण पक्षसे आज कराओगओ जानकारी अनुसार सकभर अप्रिल ११ (चैत २८)गतेक दिन के के राना युट्युब च्यानलमे अप्लोड होनिया “तोसे प्यार हुइगओ रे“ बोलकि गीत गायिका पबि खड्का (राना) औ दाउत राई गाइ हएँ ।
काठमाडौंमे सुटिङ भै जा गीतमे प्रमिला राना औ शिशिर राना मोडलिङ करि हएँ प्रमिला राना मिस्टर एन्ड मिस रानाथारुकि सेकेन्ड रनरअप भै रहएँ । जा गीतको भिडियो डाइरेक्सन निशान घिमिरे करि हएँ । मेलोडियस औ प्रेम रोमान्टिक भावमे बनि जा गीतमे नयाँपन हए कहिके जानकारी मिलो हए । हिन्दी, नेपाली, अंग्रेजी, थारु लगायत सबय गीतके रसिया संगितकर्मी कृष्ण राना बिदेशमे रहिके फिर अपनो मातृ लवज, मात्री भासा प्रेमके मारे राना भाषामे गीत बनानको मन लगो बताइ हएँ ।
दशकौं पहिलेसे गीत संगीतमे एक गिटारिस्टके रुपमे अपन परिचय बनाए संगीतकर्मी कृष्ण राना समुदायके संघसंस्थामे सदामान सहयोग कर्त आए हएँ । रानाथारु भाषा गीत लगायत सामुदायिक बिकासके शुभचिन्तक संगितकर्मी राना आनिया दिनमे सबय मेलकी गीत औ गीतमे निरंतरता रहैगो कहतए आजकल युट्युबमे राना गीत देखके बिकट खुसी लगत हए बताइ हएँ ।
