पत्रकार उन्नती चौधरीद्वारा लिखित ‘निसाफ’ लेख संग्रह विमोचन गरिएको छ । बुधबार एक कार्यक्रमका बिच सुदूरपश्चिम विश्व विद्यालयका पूर्व राजिष्टार एवं शिक्षाविद् डा. हेमराज पन्तले संग्रह बिमोचन गरेका हुन् । निसाफ लेख संग्रहमा लेखिकाले आफ्नो जीवन संघर्षलाई प्रस्तुत गरेकी छन् । उनले लैङ्गिक हिंसा, महिला हिंसा लगायत थारु समाजको संस्कृति, रीतिरिवाज, चाडपर्व, पारिवारिक जीवन, कमैया प्रथा, युगौदेखि हुँदै आएको शोषण र राजनीति लगायत अन्य सामाजिक र आर्थिक पक्षलाई प्रस्तुत गरेकी छन् ।

कार्यक्रमका प्रमुख अतिथी समेत रहेको डा. पन्तले निसाफलाई एउटा प्राज्ञिक महत्व बोकेको लेख संग्रह रहेको बताए । साथै उनले थारु समुदायको समाजशास्त्रीय र मानवशास्त्रीय अध्ययन गर्न चाहने विद्यार्थी तथा पाठकलाई महत्वपूर्ण सन्दर्भ सामग्री हुने बताए ।
नाष्ट कलेजका प्रवन्ध निर्देशक शिवहरि मुडभरीले निसाफले थारु लोक कला तथा ज्ञानको हस्तान्तरणमा सहयोग पु¥याउने बताएका थिए ।
कैलाली बहुमुखी क्याम्पसका पूर्व क्याम्पस प्रमुख सुरेन्द्र चन्दले निसाफले समाजमा पथ प्रदर्शकको भूमिका खेल्ने बताएका थिए ।

विमोचन कार्यक्रमका वक्ताहरुले निसाफ लेख संग्रहलाई समाजको पथ प्रदर्शकको रुपमा व्याख्या गरेका थिए । केर्नी मिडिया प्रालिद्वारा प्रकाशित ‘निसाफ’ लेख संग्रहको मुल्य रु.५०० रहेको छ । तर भदौ महिनाभरि कितावको मुल्यमा ५० प्रतिशत छुटको व्यवस्था गरिएको जनाइएको छ ।