३ आश्विन २०८३, शनिबार
बि प्लस खबर
कैलालीको धनगढी उप-महानगरपालिका वडा नं १५ स्थित कनरीमा टोल विकास समिति तथा कनरी गाउँ समाजको आयोजनामा भव्य रूपमा गुरिया/गुरही असरैना कार्यक्रम सम्पन्न भएको छ। कार्यक्रम भिखु राम चौधरीको सभाध्यक्षता र वडा नं १५ का अध्यक्ष सुखदेव रानाको प्रमुख आतिथ्यतामा सम्पन्न भएको हो।
कार्यक्रममा धनगढी-१८ का वडा अध्यक्ष भुवन रिजाल, कार्यपालिका सदस्य सुष्मा चौधरी, भलमन्सा, शिक्षक, समाजसेवी, बुद्धिजीवी तथा स्थानीयको उल्लेखनीय उपस्थिति रहेको थियो।
प्रमुख अतिथि वडा अध्यक्ष रानाले गुरिया/गुरही पर्वको सांस्कृतिक महत्त्वलाई मनन गर्दै भविष्यमा यस कार्यक्रमको लागि वडाबाट बजेट विनियोजन गर्ने प्रतिबद्धता व्यक्त गरे।
विशिष्ट अतिथि रिजालले थारु समुदायको ऐतिहासिक र समृद्ध सांस्कृतिक विरासतको संरक्षण तथा अनुसन्धानमा राज्यले ध्यान दिनुपर्ने आवश्यकता औंल्याए।
कार्यक्रमस्थललाई ‘गुरिया मिलन चौक’ को रुपमा नामाकरण गरिएको छ। कार्यपालिका सदस्य सुष्मा चौधरीले अबदेखि कनरी गाउँका गुरिया/गुरही कार्यक्रम यही चौकमा मनाइने जानकारी दिइन्।
समाजसेवी र बुद्धिजीवी रतिराम चौधरीले गुरही–गुरियाको सांस्कृतिक र सामाजिक महत्त्वबारे प्रकाश पारे। कार्यक्रममा स्थानीय कलाकारहरूबाट विविध सांस्कृतिक प्रस्तुति समेत प्रस्तुत गरियो। कार्यक्रमको स्वागत मन्तव्य पूर्व भलमन्सा असरानी चौधरीले दिएकी थिइन् भने सञ्चालन करिश्मा चौधरीले गरेकी थिइन्।
