धनगढीका एक युवक खैरो हेरोइनसहित पक्राउ परेका छन्।

जिल्ला प्रहरी कार्यालय कैलाली र लागूऔषध नियन्त्रण ब्युरो शाखा धनगढीले संयुक्त रुपमा खटिएको प्रहरी टोलीले लागूऔषधसहित एकजनालाई नियन्त्रणमा लिएको हो। मंगलवार अपराह्न करिब ४ बजे धनगढी उपमहानगरपालिका–२ मिलनचोकमा भारततर्फबाट नेपाल आउँदै गरेको सुदूरपश्चिम प्रदेश ०१–००९ प ४०८१ नम्बरको मोटरसाइकललाई शंका लागि चेकजाँच गर्दा मोटरसाइकल चालक धनगढी–११ बस्ने २९ वर्षीय सन्त राम राना पक्राउ परेका हुन्।

रानाले चलाएको लेग गार्डमा लुकाइ छिपाइ राखिएको अवस्थामा ६ ग्राम ८३० मिलिग्राम लागूऔषध खैरो हेरोइन फेला परेको प्रहरीले जनाएको छ। बरामद पदार्थसहित मोटरसाइकल र रानालाई नियन्त्रणमा लिएर थप अनुसन्धान भइरहेको प्रहरीले जनाएको छ।