कञ्चनपुर जिल्लाको लालझाडी गाउँपालिका वडा नम्बर २, कस्वामा बसोबास गर्दै आउनु भएका श्री नारद राना ज्यूको घरमा हिजो साँझ अचानक आगलागी हुँदा ठूलो क्षति भएको छ।

आगलागीबाट घरभित्र रहेका लुगाफाटा, खाद्यान्न, भाँडाकुँडा, ओढ्ने–ओछ्याउने सामग्रीसहित अन्य सम्पूर्ण सम्पत्ति पूर्ण रूपमा जलेर नष्ट भएको जनाइएको छ।

घटनाको जानकारी प्राप्त भएपछि आज लालझाडी गाउँपालिकाका अध्यक्ष श्री निर्मल राना घटनास्थल पुगेर पीडित परिवारलाई राहत सामग्री हस्तान्तरण गर्नुभएको छ। राहत सामग्रीमा लुगा, कम्बल, त्रिपाल, भाँडाकुँडा तथा खाद्यान्न समावेश रहेको छ।

अध्यक्ष रानाले पीडित परिवारप्रति सहानुभूति व्यक्त गर्दै भने,

“गाउँपालिकाले तत्कालका लागि राहत उपलब्ध गराएको छ, दीर्घकालीन क्षतिपूर्तिका लागि सम्बन्धित निकायहरूसँग छलफल गरी आवश्यक सिफारिस पनि गरिनेछ।”