निरन्तर भईरहेको वर्षाका कारण सुदूरपश्चिमका पहाडी जिल्ला तर्फका विभिन्न सडकहरु भासिन थालेका छन् ।

अछामको चौरपाटी गाउँपालिका स्थित चौखुट्टे–साँफेबगर सडकखण्ड भासिएको छ । यस्तै डोटीको शिखर नगरपालिका ३ को रामपुर स्थित दिपायल डडेलधुरा सडक खण्डको मुख्य सडक अन्दाजी २० मिटर बाटो भासिएको छ । वर्षाका कारण सडकको केही भाग भासिएपछि उक्त सडक खण्डहरुमा सवारी साधन आवतजावत जोखिमपूर्ण बनेको छ ।
भासिएको सडकको तत्काल निरीक्षण गरी मर्मत तथा सुरक्षित रूपमा यातायात सञ्चालनको व्यवस्था गर्न सम्बन्धित निकायसँग स्थानीयले माग गरेका छन् ।
यसैबीच, निरन्तरको वर्षाका कारण देशका विभिन्न स्थानका सडकमा चिरा पर्ने, भासिने तथा पहिरो जाने क्रमसमेत बढेको छ ।
यसले लामो तथा छोटो दूरीका सवारीसाधनको आवागमनमा चुनौती थपिएको छ । वर्षाका कारण नदी तथा खोलाको बहाव बढ्न सक्ने भएकाले नदी तटीय क्षेत्रका बासिन्दालाई सतर्क रहन सम्बन्धित निकायले आग्रह गरिरहेका छन् ।