नेपालीहरूको प्रमुख चाड दसैँ–तिहार नजिकिँदै गर्दा सार्वजनिक यातायात व्यवसायीहरूले यात्रुको चाप बढे पनि भाडा नबढाउने प्रतिबद्धता जनाएका छन् ।
नेपाल यातायात व्यवसायी राष्ट्रिय महासंघका अध्यक्ष पुण्यप्रसाद सिटौला (सरोज) ले प्रतिनिधिसभाको पूर्वाधार विकास समितिको बैठकमा पेट्रोलियम पदार्थको मूल्य यथावत रहेसम्म हाल कायम भाडादरमै यात्रुलाई सेवा दिने बताएका हुन् ।

उनले चाडपर्वमा अग्रिम टिकट बुकिङभन्दा पनि यात्रुलाई सुरक्षित रूपमा गन्तव्यसम्म पुर्‍याउनु मुख्य चुनौती रहेको बताए । सडकको दयनीय अवस्था र ठाउँ–ठाउँमा भइरहेको अवरोधका बाबजुद सरकारसँग समन्वय गरेर यातायात सेवा सञ्चालन गरिने उनको भनाइ छ ।
चाडपर्वका बेला घर फर्किने यात्रुको संख्या बढ्ने भएकाले सार्वजनिक यातायातमा चाप बढ्ने गरेको छ । विगतमा यात्रुको चापको फाइदा उठाउँदै तोकिएको भन्दा बढी भाडा असुल्ने तथा यात्रुसँग दुव्र्यवहार हुने गुनासा आउने गरेका थिए । यस वर्ष भने त्यस्ता समस्या हुन नदिने व्यवसायीहरूले बताएका छन् ।