कञ्चनपुरमा दोधारा चाँदनी र भीमदत्तनगर जोड्ने महाकाली नदी माथिको झोलुङ्गे पुलमा भएको क्षतिबारे सरकारले प्राविधिक अध्ययन थालेको छ । आज बिहान झोलुङ्गे पुलको एउटा स्पान र बीचको टावर नै भाचिएछि पूर्णरुपमा आउ–जाउ बन्द भएको छ ।
कञ्चनपुरका प्रमुख जिला अधिकारी मदन कोइरालाले आज बिहान क्षतिग्रस्त पुलको निरीक्षण गर्दै पुल कसरी क्षतिग्रस्त भयो भन्नेबारे प्राविधिक अध्ययन अगाडि बढाइने बताए ।
कोइरालाका अनुसार पुलको क्षतिको प्राविधिक कारण पहिचान गर्न सुदूरपश्चिम प्रदेशको यातायात मन्त्रालयअन्तर्गतको पूर्वाधार निर्देशनालयको प्राविधिक टोली बोलाइएको छ । उक्त टोलीले स्थलगत निरीक्षण गरी पुल कसरी क्षतिग्रस्त भयो भन्ने प्राविधिक विश्लेषण गर्ने छ ।
प्राविधिक टोलीको रिपोर्ट प्राप्त भएपछि सम्बन्धित निकायसँग समन्वय गरी पुललाई सकेसम्म छिटो सञ्चालनमा ल्याउने प्रक्रिया अघि बढाउने प्रजिअ कोइरालाको भनाइ छ ।