बंगालको खाडीमा विकसित भइरहेको न्यूनचापीय प्रणालीको प्रभावले बिहीबारदेखि नेपालका विभिन्न क्षेत्रमा वर्षा र हिमपातको सम्भावना बढ्ने भएको छ। मौसमविद्हरूका अनुसार बिहीबार रातिदेखि शुक्रबार रातिसम्म यसको प्रभाव बढी देखिनेछ भने केही स्थानमा भारी वर्षा हुन सक्नेछ ।

जल तथा मौसम विज्ञान विभागका मौसमविद् रोजन लामिछानेका अनुसार कोशी, मधेस, बागमती, गण्डकी र लुम्बिनी प्रदेशको पूर्वी भागमा तुलनात्मक रूपमा बढी वर्षा हुने सम्भावना छ । कर्णाली, सुदूरपश्चिम र लुम्बिनीको पश्चिमी क्षेत्रमा भने वर्षा तथा हिमपातको सम्भावना कम छ ।

सम्भावित वर्षा र हिमपातलाई ध्यानमा राख्दै मौसमविद्हरूले पर्वतारोहण तथा पदयात्रामा जाने पर्यटकलाई सावधानी अपनाउन र यात्राअघि मौसमको जानकारी लिन आग्रह गरेका छन्। साथै, धानबाली भित्र्याउने समय भएकाले किसानलाई पनि वर्षा सुरु हुनुअघि नै काट्न तयार भएको धान सुरक्षित राख्न सुझाव दिइएको छ ।